Ek noem hulle Doopengele

Doopengele

Die volgende dag wag ek opgewonde vir God om my meer te kom wys. Hy stel my nie teleur nie. Ons kom weer aangestap na die denkbeeldige lyn waar vyf engele hierdie keer vir ons wag.  Jesus stap oor die lyn en groet elkeen met die hand.  As Jesus weer by my aansluit draai ons om en stap in die rigting van die fontein maar een van die vyf engele is saam met ons.  By die fontein druk die engel sy hand in die water in wat deur die fontein opgespuit word.  Die water se kleur verhelder, is asof dit blinkertjies inkry, dit word soos kristal, sprankelende water, skitterblink soos diamant.  Jesus druk Sy hand in en dieselfde gebeur, die Heilige Gees wat ook teenwoordig is druk ook Sy hand in en dieselfde gebeur weer. O, okay dink ek, ek wil ook hierdie doen, maar aag ja teleurgesteld kyk ek na die water, niks het gebeur nie.

Jesus gaan sit op die rand van die fontein met die engel kniellend voor Hom, water drup van Jesus se hande af in die engel se hande in.  My brein werk oortyd om te probeer verstaan wat Hy vir my wil sê. Ek maal alles deur my kop, God is die fontein van lewe, water bring lewe, Jesus is die bron van lewe… so dink ek maar sukkel om die betekenis te ontsyfer.  As ek my oë so op die water hou wat drup in die hande van die engel snap ek ewe skielik wat Hy probeer sê: “Dit gaan oor die doop, skree ek hier in my binneste uit”. Jesus se gesig helder op en Hy gee my ‘n “Hi five” toe ek dit eintlik gesnap het.  Die engel glimlag ook breed, hierdie engel behoort aan ‘n “orde” wat met elke doop betrokke is.  Met elke doop oorhandig hulle namens God die water van die lewe, die bron van voeding, die fontein van die waarheid, die weg na waters waar rus is.  Met ander woorde elke mens se begin is met hierdie vooruitsigte wanneer jy gedoop word.  Dit hang van ons af hoe ons dit ontwikkel en hoe ons geestelik daarmee groei. Is dit dalk hier waar ons, ons beskermengele ontvang?

Maar dit laat dan ‘n nuwe vraag by my, is dit net mense wat gedoop word wat beskermengele ontvang….. Ek sal eerder hou by Ps 34:8 Want die engel van die Here hou wag oor almal wat Hom dien, en Hy red hulle.