Gerubs - Die Magtigste van alle engele

Voorstelling van Gerubs in die Allerheiligste in Salomo se tempel

As ‘n mens navorsing doen oor engele kom jy agter hoe daar verskil word oor die ordes en funksies van engele, so gee sommige mense die Gerubs die hoogste orde terwyl ander weer Serafs die ereplek gee. Ek het gegaan volgens Skrifte in (Ese 1:26-27, 10:1, Jes 37:16) wat sê dat Gerubs die troon van God dra en vir my plaas dit hulle eerste. Buiten dat hulle die troon dra het God hulle ook gemaak om Sy troon te beskerm en om Hom te begelei. Hulle is betrokke by God se geregtigheid, heerlikheid en mag en hulle bring ook openbarings na mense toe.  Buiten die idilliese beeld wat mense koester oor hulle, gebruik God hulle ook om stroms, wolke, weerlig, lig of vuur te veroorsaak. Ons lees in die Bybel dat Gerubs se vlerke ‘n harde geluid maak as hulle vlieg, dit is soos ‘n dreunklank van baie waters, soos die stem van God, soos die geluid van ‘n groot leërmag. Ons kan sien in die verhaal van Eden dat daar meer as een Gerub is, waar hulle gaan staan het om te keer dat die mens sal terug keer na die Paradys toe. In Ese 28:14-16 lees ons dat Satan 'n Gerub was toe hy geskape is, om die waarheid te sê hy was dié gesalfde Gerub. Net soos wat Migael 'n Aartsengel is, met mag oor al die engele, so was Satan 'n Aartsgerub, een wat aangestel was oor al die ander Gerubs. Omdat Gerubs die hoogste orde van hemelse wesens is en Satan die Aartsgerub was, het dit hom hoër as Migael geplaas.

Hoe word Gerubs aan ons uitgebeeld in die Bybel:
• Soos mense met arms en bene met brons voetsole wat soos die van ‘n kalf vertoon.
• Met 4 gesigte, die van ‘n mens, leeu, bees en arend.
- ‘n Mens (wat die simbool gee van verstandigheid, m.a.w. hulle het ook ‘n siel).
- ‘n Leeu (wat krag simboliseer)
- ‘n Bees (wat gewilligheid simboliseer, m.a.w hulle is so diensbaar soos ‘n os)
- ‘n Arend (wat snelheid simboliseer)
- Met baie oë (wat skerpsinnigheid en voorsienigheid simboliseer)

Hulle word gesien met:
- 1 gesig en 2 vlerke. (1 Kon 6:23-28)
- 2 gesigte en 2 vlerke (Ese 41:18)
- 4 gesigte en 4 vlerke: (Ese 1:6, 25-26, dieselfde wesens word ook gesien in Ese 10:1)

• Hulle is gesien as blink of skitterend soos helder lig of vuur.

• Hulle is toegerus met swaarde Gen 3:24.