Laat ons vashou aan hoop

Jy en Jesus stap saam in suiwer skoon lug, ‘n duif kom sit op Sy een hand en ‘n arend op die ander hand. Die duif is vir jou die teken van die Heilige Gees se nabyheid met jou hoopvolle verwagtinge wat Hy volbring en die arend simboliseer jou bereidwillig om God se opdragte uit te voer, om die werk gedoen te kry wat God van jou verwag. Laat hierdie voëls saam werk in jou lewe, laat hulle saam vlieg om God se werk op aarde in eenheid met jou deur te voer.

'n Beroemde Noorweegse ontdekker Roald Amundsen, die eerste persoon om die Noord en Suid Pool te ontdek het op een van sy reise ’n posduif saam met hom geneem. Toe hy die Noordpool bereik, het hy die duif uit sy hok vrygelaat. Verbeel jou die vreugde wat Amundsen se vrou in Noorweë beleef het toe die duif bo haar huis sirkel en land. Sy het geweet haar man lewe!  Sy is getroos deur die teenwoordigheid van die duif!  Net so was dit toe Jesus opgevaar het na die hemel. Hy was weg, maar die dissipels het vasgehou aan Sy belofte om vir hulle die Heilige Gees te stuur. Ons hou vas vandag aan HOOP dat dinge beter sal word in ons land.

LUISTER na die reën wat God op jou lewe bring, moenie dat dit jou bedruk maak nie maar word eerder bewus van die vrolikheid, die vreugde, die vriendelikheid en die passie wat God wil hê jy moet uitleef om jou lewe ten volle te kan geniet, dis wat Hy vir jou ingedagte het en dis hoe Hy oor jou voel.
PROE die soetheid van God se vrug, 'n geskenk aan jou, Hy wil dat jy die vrug van liefde, vreugde, vrede, geduld, vriendelikheid, goedhartigheid, getrouheid, nederigheid en selfbeheersing moet toepas, sodat jy Sy oorvloedige seëninge kan beleef.
RUIK dit wat God vir jou in gedagte het, julle stap saam deur die tuin van God en geniet saam die geur van Sy Koningskap, Heerskappy en Skepping tot in einde van dae. Dis wat Hy vir jou beplan want jy behoort aan Hom.
SIEN die mooi dinge in die lewe raak, moenie altyd net die slegte raak sien nie maar sien dit raak wat God bedoel het ons moet geniet op Aarde, laat die Heilige Gees toe om die bereidwilligheid soos 'n Arend in jou los te maak.